اوتار 2

كانوا صديقاتي دايما يحاولوا يعزموا عليا اقعد معاهم لكن كنت بتحجج باني عايزة اسمع بتركيز لكن بيني و بينكم الموضوع كان جوايا اني مش قادره اتواصل مع حد
و في يوم رحت زي عادتي رحت فالميعاد لكن غدير اتأخرت فجت مايسه قالتلي ماتيجي تقعدي معانا بقى وبطلي التناكه بتاعتك دي انتي قرفانه مننا ولا ايه هو في حد ضايقك فينا؟
انا : ليه بتقولي كده تناكه ايه وقرفانه ايه يا مايسه مانتي عارفه اني بحب اسمع غدير بتعزف فهدوء وانتم ما بتبطلوش رغي وبيحلالكم الكلام وقت لما تبدأ
مايسه: سيبك من الكلمتين اللي حفظتهم دول هو انا مش عارفاكي ولا ايه دي عشره عمر يا بنتي انتي هتكلي عقلي بالكلمتين اللي بتضحكي بيها على بقيت البنات الهبل اللي هناك دول ولا ايه لعلمك بقى انا فقساكي و عارفاكي اكمني مابتكلمش لا دانا فاهمه كل حاجه
انا: فاهمه ايه بس
مايسه: بقولك ايه متعكننيش عليا و قومي ياللا معايا لاروح اقولهم البت خارجه من قصه حب فاشله وافضحك
انا ووشي اتغير: ايه ده ايه الكلام اللي انتي بتقوليه ده و جبتيه منين
قالت لي شوفتي يابت دانتي صاحبتي ومتربين سوا وبعرفك من سكوتك قومي ياللا ولا هاا
وراحت شداني من ايدي و وخداني على الترابيزه اللي فيها بقيت الشله
مايسه: تصقيه كبيرة اوي عشان شيرين رضيت عنا وتكرمت ونزلت من عالكرسي العرش و هتقعد مع عامه الشعب اللي هو انتم
ههههههههه (البنات) بصوت واحد
قعدت على طرف القعدة وكانت مايسه طبعا جنبي والكرسي اللي قدامي فاضي بدأت تضحك و تهيص زي عادتها وفجاه لقيت بنت معرفهاش جت تقعد عالكرسي اللي قدامي و جت عيني في عينها معرفتش اقول حاجه هزيت راسي بتحيه لاقيتها بتبتسم ولاقيت مايسه بصوت عالي فودني وانا سرحانه فالمشهد بتقول:عاليا جارتنا ساكنا جديد فالشقه اللي قصادي عروسه بقالها 3 شهور بس العريس ياعيني مسافر على طول وسايبها الغلبانه اصله بشتغل مهندس بترول فالكويت
مدت عاليا ايديها وانا مديت ايدي اسلم قالت عاليا انتي شيرين مايسه دايما تحكيلي عنك
رديت ياتري بتقول ايه ربنا يستر
عليا: لا والله كل خير